న్యూయార్క్: ఐక్యరాజ్యసమితి (UN) భద్రతా మండలిలో తాత్కాలిక సభ్యదేశాల ఎన్నికల ఫలితాలు అంతర్జాతీయంగా పెను సంచలనాన్ని సృష్టించాయి.
ఈ ఎన్నికల్లో ఆసియా-పసిఫిక్ రీజియన్ నుండి కిర్గిజిస్తాన్ చారిత్రాత్మక విజయాన్ని అందుకోగా, యూరప్ దిగ్గజం, బలమైన ఆర్థిక శక్తి అయిన జర్మనీ ఘోర పరాజయాన్ని చవిచూసింది.
1992లో ఐరాసలో చేరిన తర్వాత కిర్గిజిస్తాన్ ఈ అత్యున్నత మండలిలో సీటు సాధించడం ఇదే తొలిసారి.
193 సభ్యదేశాలు కలిగిన ఐరాస జనరల్ అసెంబ్లీ నిర్వహించిన ఈ రహస్య ఓటింగ్ ద్వారా ఐదు కొత్త తాత్కాలిక సభ్యదేశాలను (2027-28 కాలపరిమితికి) ఎన్నుకున్నారు.
ఈ రేసులో – కిర్గిజిస్తాన్, ఆస్ట్రియా, పోర్చుగల్, ట్రినిడాడ్ అండ్ టొబాగో, జింబాబ్వే దేశాలు – విజయం సాధించాయి.
హోరాహోరీ పోరు – ఫిలిప్పీన్స్పై కిర్గిజిస్తాన్ ఘనవిజయం
ఆసియా-పసిఫిక్ కేటగిరీలో తీవ్ర ఉత్కంఠ నెలకొంది. ఈ సీటు కోసం కిర్గిజిస్తాన్, ఫిలిప్పీన్స్ దేశాల మధ్య నాలుగు రౌండ్ల పాటు తీవ్రమైన పోటీ నడిచింది.
మొదటి రౌండ్లో కిర్గిజిస్తాన్ 105 ఓట్లతో ముందంజ వేయగా, నాలుగో రౌండ్ ముగిసేసరికి ఏకంగా 142 ఓట్లను సాధించి, కేవలం 49 ఓట్లు పొందిన ఫిలిప్పీన్స్ను భారీ తేడాతో ఓడించింది. ఈ విజయంతో సెంట్రల్ ఆసియా (మధ్య ఆసియా) ప్రాంతానికి అంతర్జాతీయ వేదికపై నేరుగా తమ గళాన్ని వినిపించే ఒక అద్భుతమైన అవకాశం లభించింది.
జర్మనీకి చారిత్రాత్మక ఎదురుదెబ్బ
పశ్చిమ యూరప్, ఇతర దేశాల (WEOG) కేటగిరీలో పోటీ పడిన జర్మనీకి ఈ ఎన్నికలు తీవ్ర నిరాశను మిగిల్చాయి. ఈ గ్రూపులో ఉన్న రెండు స్థానాల కోసం జరిగిన పోరులో పోర్చుగల్ (134 ఓట్లు), ఆస్ట్రియా (131 ఓట్లు) విజయం సాధించగా.. జర్మనీకి కేవలం 104 ఓట్లు మాత్రమే వచ్చాయి.
గతంలో ఆరుసార్లు భద్రతా మండలిలో పనిచేసిన జర్మనీకి ఈ ఓటమి ఒక పెద్ద ఎదురుదెబ్బగా నిలిచింది. రష్యా-ఉక్రెయిన్ యుద్ధంలో ఉక్రెయిన్కు జర్మనీ గట్టి మద్దతు ఇవ్వడం, అలాగే మిడిల్ ఈస్ట్ సంక్షోభంలో ఇజ్రాయెల్కు అండగా నిలవడం వల్లే కొన్ని దేశాలు జర్మనీకి వ్యతిరేకంగా ఓటు వేసి ఉండవచ్చని విశ్లేషకులు భావిస్తున్నారు.
బహుళపక్ష విధానానికి (Multi lateralism) సరికొత్త ఊతం
ఈ ఎన్నికల ఫలితాలు అంతర్జాతీయ రాజకీయాల్లో మారుతున్న సమీకరణాలకు అద్దం పడుతున్నాయని నిపుణులు అభిప్రాయపడుతున్నారు.
కేవలం పెద్ద, శక్తివంతమైన దేశాల కూటములకే కాకుండా, అభివృద్ధి చెందుతున్న చిన్న దేశాలకు కూడా ప్రపంచ నిర్ణయాధికారాల్లో సమాన ప్రాధాన్యత దక్కాలనే ‘బహుళపక్ష విధానం’ (Multi lateralism) వైపు ప్రపంచం అడుగులు వేస్తోందని ఈ ఫలితం నిరూపించింది.
కౌంటర్ టెర్రరిజం, ట్రాన్స్నేషనల్ క్రైమ్స్, నీటి భద్రత వంటి కీలక అంశాలపై ఇకపై సెంట్రల్ ఆసియా దేశాల తరఫున కిర్గిజిస్తాన్ నేరుగా భద్రతా మండలి ఎజెండాను ప్రభావితం చేయనుంది.
ఈ నూతన తాత్కాలిక సభ్యదేశాలు 2027 జనవరి 1 నుండి తమ రెండేళ్ల పదవీకాలాన్ని ప్రారంభించనున్నాయి.
కాగా, ఈ చారిత్రాత్మక విజయం సాధించిన దేశాలకు భారత్ కూడా తన హృదయపూర్వక అభినందనలు తెలియజేస్తూ, రాబోయే కాలంలో వారితో కలిసి పనిచేసేందుకు సిద్ధంగా ఉన్నట్లు ప్రకటించింది.
– బాచి
