భానుడి భగభగలు, తీవ్రమైన ఎండలతో ఉడికిపోతున్న ఆంధ్రప్రదేశ్ ప్రజలకు భారత వాతావరణ శాఖ (IMD) చల్లని కబురు అందించింది.
ఇప్పటికే కేరళను విజయవంతంగా తాకిన నైరుతి రుతుపవనాలు ఇప్పుడు వేగంగా ఆంధ్రప్రదేశ్ వైపు దూసుకొస్తున్నాయి. వాతావరణ అధికారుల అంచనా ప్రకారం, జూన్ 5 (శుక్రవారం) నాటికి రుతుపవనాలు రాయలసీమ ప్రాంతం ద్వారా ఏపీలోకి ప్రవేశించనున్నాయి.
జూన్ 15 నాటికి రాష్ట్రమంతా విస్తరణ
విశాఖపట్నం వాతావరణ కేంద్రం తెలిపిన వివరాల ప్రకారం, జూన్ 5న రాయలసీమలోని కొన్ని ప్రాంతాలను తాకనున్న రుతుపవనాలు.. ఆ తర్వాత క్రమంగా ముందుకు సాగుతాయి.
జూన్ 10 నాటికి కోస్తా ఆంధ్రాలోని పలు ప్రాంతాలకు, జూన్ 15 నాటికి ఆంధ్రప్రదేశ్ రాష్ట్రం మొత్తం ఇవి విస్తరించనున్నాయి.
రుతుపవనాల రాకతో గత కొన్ని రోజులుగా నమోదవుతున్న రికార్డు స్థాయి ఉష్ణోగ్రతల నుండి ప్రజలకు భారీ ఉపశమనం లభించనుంది.
రాబోయే 5 రోజులు ఉరుములు, మెరుపులతో కూడిన వర్షాలు
రుతుపవనాల ముందస్తు ప్రభావం వల్ల రాబోయే ఐదు రోజుల పాటు కోస్తా ఆంధ్రా, యానాం మరియు రాయలసీమ ప్రాంతాల్లో అక్కడక్కడా ఉరుములు, మెరుపులతో కూడిన తేలికపాటి నుండి మోస్తరు వర్షాలు కురిసే అవకాశం ఉందని ఐఎండీ హెచ్చరించింది.
వాతావరణ హెచ్చరిక: వర్షంతో పాటు గంటకు 50 నుండి 60 కిలోమీటర్ల వేగంతో బలమైన ఈదురుగాలులు వీచే ప్రమాదం ఉందని, ప్రజలు, ముఖ్యంగా రైతులు అప్రమత్తంగా ఉండాలని అధికారులు సూచించారు.
ఇప్పటికే గత 24 గంటల్లో రాయలసీమలోని వైఎస్ఆర్ కడప జిల్లా కొండాపురం, శ్రీసత్యసాయి జిల్లా ధర్మవరం, అనంతపురంలోని గుత్తి ప్రాంతాల్లో గరిష్టంగా 6 సెం.మీ చొప్పున ముందస్తు వర్షపాతం నమోదైంది. కదిరి, లేపాక్షి ప్రాంతాల్లో 4 సెం.మీ వర్షం కురిసింది.
ఈ ఏడాది వర్షపాతం ఎలా ఉండబోతోంది?
ప్రీ-మాన్సూన్ (మార్చి నుండి మే) సీజన్లో ఆంధ్రప్రదేశ్లో సాధారణం కంటే 17 శాతం తక్కువ వర్షపాతం నమోదైంది.
కాగా, ఈ ఏడాది నైరుతి రుతుపవనాల కాలంలో (జూన్ – సెప్టెంబర్) ఎల్ నినో (El Niño) ప్రభావం కారణంగా దక్షిణ ద్వీపకల్ప భారతదేశంతో పాటు ఆంధ్రప్రదేశ్లో కూడా – సాధారణం కంటే కొద్దిగా తక్కువ వర్షపాతం (దీర్ఘకాల సగటులో 90-95 శాతం) – నమోదయ్యే అవకాశం ఉందని ఐఎండీ తన తాజా నివేదికలో పేర్కొంది.
ప్రస్తుత వేసవి తాపానికి ఈ రుతుపవనాల రాక పెద్ద ఊరటనిస్తుందని భావించవచ్చు.
– బాచి
